INDMO ATRIBUI SERTIFIKADU KOMPETENSIA NIVEL II BA GRADUADU SENTRU FORMASAUN DOM BOSCO COMORO NIAN

DILI, 26-08-2021, Iha 26 agostu 2021, Instituto Nacional de  Dezenvolvimento Mão-de-Obra (INDMO) atribui Sertifikadu Kompetensia Nivel II iha setor sira asosia ba administrasaun, konstrusaun no transporte ba formandu graduadu husi Sentru Formasaun Dom Bosco Comoro (SFDB-Comoro), hamutuk nain 142 (atus ida hat nulu resin rua).

Formando graduado sira hahu sira nian formasaun iha SFDB-Comoro husi  tinan 2020. Sira ne’e kompostu husi area industrial sira hanesan; administrasaun, automotive, soldadura, karpinteiru, kanalizasaun, eletrisidade. Inklui iha grupu graduado sira 142, exerzitu sira F-FDTL hamutuk nain 10.

Diretor Komunidade Salezianu Dom Bosco Comoro, Reveredisimu Pe. Hermenegildo Pereira, SDB nebe reprezenta sentru formasaun, agradese no apresia tebes ba INDMO no parseriu sira hotu  nia apoiu rohan laek hodi garantia kualidade sentru formasaun. Diretor Komunidade ne’e mos louva dedikasaun formando hodi konklui formasaun ho susesu no dezeja futuru nabilan mos ba graduado sira.

Molok entrega sertifikadu nian  Ministru Coordenador dos Assuntos Económicos, Exelensia Senhor Joaquim Amaral,  liu husi nia diskursu, enkoraja nafatin Sentru Formasaun Dom Bosco Comoro no nia parseriu sira, inklui INDMO atu apoia ba joventude hodi hasa’e no kapasidade prepara ba iha kampu de trabalho.

Sertifikadu ne’e entrega direta husi Diretora INDMO Senhora Isabel Soares de Lima ho Ministru Coordenador dos Assuntos Económicos, Exelensia Senhor Joaquim Amaral iha Ginásio de Dom Bosco Comoro Dili.

Seremonia ne’e hetan partisipasaun husi Membru Governu, Komadante F-FDTL, Diretora INDMO, parseiru dezenvolvimentu sira, no inan aman formando graduado sira.

“ Média INDMO”