MEJD PRONTU SERVISU HO INDMO, I.P LORI SUSESU BA ENKONTRU GBM (GOVERNING BOARD MEETING) BA DALA 34 IHA TIMOR-LESTE
Diretora INDMO, I.P Sra. Isabel Fernandes de Lima ne’ebé akompaña husi Assesor Reforsu Institusional INDMO nian, Sr.Aqueles S. Guterres no Assesor pontu fokal ba INDMO, I.P Sr. Abilio Serrano, iha loron Terça-Feira, Janeiru 2023 ne’e hala’o audénsia ho Ministro da Educação, Juventude e Desporto (MEJD) S.Excia DR. Armindo Maia iha Salaun Enkontru MEJD Villa Verde, Dili.
Audénsia ne’e, Diretora INDMO, I.P Sra. Isabel Fernandes de Lima hato’o informasaun sira kona-ba rezultadu vizita ofisial delegasaun Timor-leste nian ne’ebé lidera husi Diretora INDMO, I.P rasik partisipa iha Enkontru Internasionál Konselu Administrasaun “SEAMEO VOCTECH” ba dala 33 no “International Conference 2022 on Digitalising and Greening TVET for Sustenable Development’’ iha Bangkok, Thailandia iha fulan Outubro tinan 2022 liu ba.
Iha ámbitu enkontru ho MEJD, Diretora INDMO, I.P atual membru ba Konsellu Administrasaun SEAMEO VOCTECH Sra. Isabel F.de Lima fahe mos informasaun ba MEJD relasiona ho aprovasaun husi membru nasaun sanolu resin ida (11) ne’ebé dadaun ne’e hamahan an iha “SEAMEO VOCTECH” aseita ona Timor Leste nian proposta sei sai uma nain ba enkontru Konselu Administrasaun “SEAMEO VOCTECH” nian ba dala tolu nolu resin hat (34) ne’ebé sei realiza iha fulan Outobru tinan ne’e iha Dili, Timor-Leste.
Hafoin rona tiha informasaun ne’e, Ministro da Educação, Juventude e Desporto (MEJD) S.Excia DR. Armindo Maia kongratula ba INDMO, I.P ho nia delegasaun sira,ne’ebé reprezenta Timor-leste hodi partisipa ona iha eventu Internasionál sira iha Thailandia.
Husi sorin seluk MEJD agradese mos ba asuntu sira seluk , liu-liu liga ba Timor-Leste sei sai uma nain ba enkontru Konsellu Administrasaun “SEAMEO VOCTECH” ba dala tolu nolu resin hat (34) iha Timor-Leste, ba asuntu ne’e MEJD rekomenda parte rua (INDMO, I.P-MEJD) hamutuk estabelese ekipa ida hodi servisu hamutuk nune’e lori susesu ba enkontru Internasionál ne’e .
Alende ne’e Diretora INDMO, I.P Sra. Isabel Fernandes de Lima informa mos ba MEJD kona-ba asina Memorando de Entendimento (MdE) Entre MEJD ho INDMO, I.P no seremónia atribuisaun sertifikadu ba Fornesedor Formasaun Profisional (FFP) ne’ebé sei realiza husi INDMO, I,P iha loron Kinta-feira, 26 Janeiro 2023 iha Academia de Policia, Comoro.
Informa mos ba Público katak asina nota Memorando de Entendimento (MdE) Entre MEJD ho INDMO, I.P ho nia objetivu prinsipal maka atu hametin koperasaun entre parte rua iha setór dezenvolvimentu ESTV, no promove kualidade mão-de obra, hadi’a diak liu tan intregral iha ESTV, nudar fatin mão-de obra nebe preparadu ba iha ezijénsia merkadu laboral iha nivel nasionál no internasional
Média INDMO, I.P
