Instituto Nacional de Desenvolvimentu Mão-de-Obra, nudar ajensia reguladora Estadu Timor-Leste nian ba formasaun profisional.
Insitutu nebe kria ona ho objetivu atu dezenvolve no implementa politika formasaun profisional, define padraun kompetensia no estabelese sistema nasional sertififikasaun husi Dekretu-Lei n.º. 8/2008, 5 marsu. INDMO mos implementa atribuisaun sira liga ho avaliasaun no akreditasaun sentru no programa formasaun sira mai husi Dekretu-lei no.º. 36/2011, 17 agostu.
Iha tinan 12 nia laran, INDMO rejista ona rezultadu husi servisu kon kontrolu kualidade nian. Dezenvolve no rejista ona padraun kompetensia hamutuk 81 (ualunulu-resin-ida), husi setor produtivu oi-oin; hanesan agrikultura; pekuaria; turizmu; otelaria; kontrusaun; jornalizmu; automekaniku; finansas; jestaun negosiu; servisu publiku; servisu sosial; no formasaun no avaliasaun. Iha tinan rua ikus, inisia ona faze disksusaun hodi elabora padraun kompetensia iha setor transporte; Information and Communication Technology; rekursus minerais ka asossiadu industria estrativa; protesaun no konservasaun meiu-ambiente; Creative Arts and Fashion; retail; manufatura; saude; no prioridade nasional sira seluk.
Rejista mos iha Sistema Nacional de Qualificação sentru formasaun no avaliasaun besik 100 (atus-ida), iha nebe 25 (ruanulu-resin-lima) mak hetan ona akreditasaun no uja ona padraun kompetensia. Sentru hirak ne’e, maioria hela 70 pursentu ho sede iha Kapital Timor-Leste. INDMO sertifika ona liu formandu 18,000 (rihun-sanulu-resin ualu) husi nivel sertifikadu no area oi-oin konforme atribuisaun husi lei sira.
Servisu sira ne’e halo ona ho susesu konta ho apoiu husi entidade publika no privadu, nasional no internasonal, maka hanesan: MCAE no membru governu tutela seluk desde institutu hari’i; Ministeriu no ajensia estatal sira nebe tutela area edukasaun no area produtivu sira; reprezentante empreza nasional no internasional; ajensia reguladora iha jurisaun nasaun parseiru sira no organizasaun rejional internasional sira, hanesan CPLP, SEAMEO, ILO, ADB, GIZ no APACC; AuAid; USAid; no seluk tan. Apresia tebes no hein kontinuasaun apoiu ba reforsu sistema formasaun ne’e rasik.
Ba tinan 2021, ho orgullu INDMO lansa media komunikasaun no informasaun eletroniku ne’ebe sei tulun publiku no parseriu dezenvolvimentu sira hodi akompana besik liu tan rezultadu no progresu servisu institute nian. Bele mos asesu rejime no prosedimemtu sira kona-ba servisu kontrolu kualidade nian. Portal elektroniku www.indmo.gov.tl sei sai nudar fonte informasaun ne’ebe publiku presija.
INDMO nafatin konta ho ita bo’ot sira apoiu hodi garante kualidade sistema formasaun no informasaun sira.
Ho laran ksolok,
Isabel Fernandes de Lima.
Diretora
