INDMO-MCAE-SEFOPE OFISIALMENTE HALO ABERTURA KNA 2021

Konkursu Nasional Aptidaun (KNA) nudar atividade regular INDMO nian nebe halo ona desde 2014. Ohin 22 novembru 2021, Ministru Koordenador Asuntu Ekonomia (MCAE, sigla iha portugues), Exelensia Senhor Eng. Joaquim Amaral ofisialmente halo KNA ba Dahitu nebe halao virtualmente.

KNA 2021 sei foka deit area industrial nebe asosia ba konstrusaun nian, mak hanesan pedreiru, kanalizasaun, karpintaria, no soldadura. KNA 2021 sei hahu 22 novembru no sei ensera iha 6 dezenbru 2021. “Formando konkorente sira ba eventu anual ne’e mak husi Centro Nacinal do Emprego e Formação Profissional (CNEFP) Tibar-Liquiça; Centro Nacional da Formação Profissional (CNFP) Becora-Dili; Claretian Training Center (CTC) Salele-Covalima; Dom Bosco Training Center (BDTC) Comoro-Dili); no Centro Formação Profissional do Ir. Carlos Gamba(CFPCG), Fatumaca-Baucau. Juri sira selesiona ona ba KNA 2021 mak Agência de Desenvolvimento Nacional (ADN), Inspeção Geral do Trabalho (IGT); Community Housing Limited (CHL); New Town Entreprise (NTE); Pires Architecture no JKC Consultant,” haktuir Presidente Komisaun Organizadora, Senhor Amándio Lívio Borges Belo, atual Jerente Programa Akreditasaun no Sertifikasaun INDMO nian.

Senhora Isabel de Lima, Diretora INDMO, iha nia diskursu agradese MCAE, SEFOPE, sentru fornesedor formasaun sira no parseriu dezenvolvimentu sira hotu nia apoiu hodi fo susesu implementasaun KNA 2021 nian. Iha nia biban mos, Diretora INDMO partilla ho partisipante sira kona-ba prezensa Timor-Leste nian iha Konkursu Aptidaun nivel regional no global iha tinan 5 (sanulu ikus ne’e. Nudar observador iha ASEANskills Competition ba dala 10 (sanulu) iha Hanoi, Vietname; ASEANskills Competition dala 11 (sanulu-resin-ida) iha Kuala Lumpur, Malásia; no Worldskills Competition ba dala 45 (hat-nulu-resin-lima) iha Kazan, Russia. Iha 2019 mos, Timor-Leste envia ona competitor nain 2 (rua) no juri nain 2 (rua) partisipa ona mos the Belt and Road Skills Competition (BRISC) 2019 iha China. Hafoin INDMO lori Timor-Leste sai membru Worldskills Asia (WSA) iha 15 dezenbru 2021, iha ona dalan mos atu envia nia konkorente no juri sira ba iha Worldskills Asia ba dala 4 (hat) nebe sei halao iha Kualu Lumpur, Malazia. Antes termina ba konkorente sira no ekipa juri, Diretora INDMO hato’o, “Boa sorte competitor sira no bom trabalho ba ekipa juri.”  

Molok liu ba momentu abertura ofisial nian, Ministru Koordenador Asuntu Ekonomia, Exelensia Senhor Eng. Joaquim Amaral, apresia tebes ba dezenpenu INDMO nian tanba konsege lori timor-oan sira partisipa kompetisaun aptidaun nivel internasional no lori Timor-Leste membru Worldskills Asia iha 15 Dezenbru 2020.

Nia mos komenta katak realizasaun KNA ne’e nudar sinal normalidade atividade formasaun profisional sira no reafirma mos katak eventu ne’e nudar fórum importante ka oportunidade atu promove talentu, kualidade no prestasaun formandu sira atu kontribui ba dezenvolvimentu Timor-Leste nian.

Atu taka nia, Eng. Joaquim Amaral mos husi mensajen ajente edukasaun teknika no formasaun profisional (TVET, sigla iha ingles) nian iha Timor-Leste.

“Ba dahuluk liu hau husu INDMO atu reforsa iha kurikulu formasaun sira integrasaun abilidade sekulu XXI no/ka revolusaun industria 4.0 no/ka pratika diak sira husi empreza ka industria nian,” haktuir MCAE.

MCAE mos husu atu SEFOPE, sentru formasaun estatal no privadu sira atu presija upgrade rekursu fasilidade, ekipamentu no ferramentu ba ba formasaun no avaliasaun nian; no investe mos iha teknolojia informasaun komunikasaun (ICT, sigla iha ingles). Nune’e mos husu atu empreza no industria nasional sira atu emprega formando graduado; partisipa ativa iha dezenvolvimetu kurikulu formasaun nian mos; apoia mos fornese apoiu ruma karik sentru presija. Ikus liu, Eng. Joaquim Amaral fo mos enkoraja mos inan-aman sira atu akonsella sira iha nia oan asesu ba instituisaun TVET sira. Tanba sistema TVET ne’e prepara prepara joven sira ho abilidade sufisiente ona atu servisu ho lalais kedas depois sira nia graduasaun.

Partisipa ona iha serimonia abertura ne’e, Secretário Estado Formasaun Profisional no Empregu, Senhor Alarico de Rosário; Secretário Estado ba Promosaun Igualidade no Inkluzaun, Senhora Maria Jose da Fonseca Monteiro de Jesus; Presidente Câmara do Comércio e Indústria (CCI-TL) Senhor Oscar Lima); embaixadores sira husi Portugal, Austrália no Nova Zelândia no seluk tan;) reprezentante ensinu tekniku no formasaun profisisional sira; reprezentante emprezas no industria no parseiru dezenvolvimentu nasional no internasional sira seluk.

#Media INDMO#

Share on
  •  
  •  
  •  
  •  
  •  
  •  
error: Deskulpa !!!