SORUMUTU DIRETORA INDMO NO MINISTRO COORDENADOR ASSUNTOS ECONÓMICOS (MCAE)

Loron Segunda-feira 17/1/2022 ,  senhora Isabel Fernandes de Lima, Diretora INDMO hasoru malu ho  S.Exia. Eng.  Joaquim Amaral, Ministro Coordenador dos Assuntos Económicos iha Palácio de Governo.

Objetivu husi sorumutu ne’e mak atualiza preparasaun Ezekusaun Planu Asaun Anual no Orsamentu 2022 nian.

Iha biban hanesan, Diretora INDMO mos informa ba MCAE kona-ba preparativu sira no partisipasaun Timor-Leste nian iha Asembleia Jeral Dalimak Worldskills Asia (WSA) nebe sei realiza virtualmente iha loron 25 no 27 fulan janeiru 2022. INDMO planeia ona atu konvida mos reprezentante sira husi Gabinete MCAE, MNEC, MEJD  no SEFOPE.

Iha sorin seluk, Diretora INDMO mos relata mos preparasaun INDMO nian kona-ba organiza Konferensia Internasional TVET Daruak nian nebe sei iha tinan 2022. Eventu ida ne’e, sei hetan apoiu husi Australia Pacific Traning Coalition (APTC). INDMO sei mantein koordenasaun estreita ho Gabinete MCAE no parseriu ba susesu eventu ne’e no liu-liu garante envolvimentu ajensia publika no privadu, nasional no internasional, hanesan ILO, SEAMEO, peritus timor-oan  sira no empreza sira.

Partisipa ona mos  iha sorumutu ne’e Senhor Abilio Serrano, Asesor MCAE e Ponto Focal dezigna-ba INDMO, Senhor Amandio Belo, Jerente Programa Akreditasaun  no Sertifikasaun, no Senhor Aquiles S. Guterres, Asesor ba Reforsu  Institusional.

“Media INDMO”