KNA 2021 ENSERA OFISIALMENTE

Dili, Segunda-feira loron 6/12/2021, Instituto Nacional de Desenvolvimento Mão-de-Obra (INDMO) enssera ofisialmente Konkursu Nasional Aptidaun (KNA) Dala hitu. Eventu anual ne’e ofisialmente ensera husi Diretor Jeral Formasaun Profisional no Empregu Senhor Paulo Alves.

KNA 2021 nebe halo ona virtualmente entre 22 no 26 novembru 2021,  sentru konkorente hamutuk 5 (lima) nebe prepara ona formando hamutuk nain 30 (tolunulu), nebe ho idade entre 18-25, husi area pedreiru, soldadura, kanalizasaun, karpintaria, no eletrisidade.

Antes taka eventu anual ne’e, Diretora Isabel Fernandes de Lima, ba dahuluk, aproveita oportunidade agradese no apresia entidade hotu nebe kontribui ona ba implementasaun KNA 2021 ho susesu. Entidade sira mak hanesan MCAE, SEFOPE, sentru formasaun no formando konkorente sira, Agência de Desenvolvimento Nacional (ADN), Inspeção Geral do Trabalho (IGT); Community Housing Limited (CHL); New Town Entreprise (NTE); Pires Architecture; JKC Consultant; no media komunikasaun sosial sira.

Partikulamente ba sentru formasaun no formando konkorente sira, Diretora INDMO expressa nia haksolok bo’ot no orgullu ho dedikasaun, determinasaun konkorente hodi termina projetu konstrusaun kafetaria iha konkursu tinan ne’e. Nia husu mos sentru sira atu kuida mini cafetaria nebe sira rasik hari’i. Nia mos husu formando sira kontinua hatudu ka aplika sira nia konesimentu, abilidade, no aptidaun bainhira hetan servisu iha empreza ka hahu negosiu ruma.

Ikus liu, nia kontinua destaka papel no kumprimissu INDMO nian iha parseria ho ajensia dezenvolvimentu nasional no internasional atu promove nafatin sistema edukasaun ka formasaun nebe orienta ba servisu iha indústria no auto-emprego, preparasaun mão-de-obra ka profisional sira nebe iha kreatividade no produtividade iha serbisu-fatin, no promosaun timor-oan nebe kompetente liu husi eventu sira hanesan Feira de Carreira no Kompetisaun Aptidaun iha nivel nasional no internasional  sai mos nudar momentu importante atu formando sira no empregador sira bele hahu sira nia kontaktu ba malu.

Senhor Paulo Alves, nebe reprezenta Sekretariu Estadu Formasaun Profisional, iha nia diskursu enserramentu nian, kontinua fo enfaze importansia husi  Edukasaun no formasaun tekniku no profissional mak dalan uniku bele ajuda hasae ema nia kapasidade atu hasoru dezafiu no oportunidade sira foun iha sosiedade nebe modernu.

Nia mos akresenta katak SEFOPE no Ministeriu sira nebe tutela ba area edukasaun no formasaun, hamutuk ho parseriu dezenvolvimentu sira, maske nasional no internasional, publiku no privadu tenke hatudu sira nia komitmentu atu asegura formasaun forsa traballu nebe ho kualidade a’as, reziliente, prontu nafatin, no bele kompete ho saudável iha merkadu traballu nasional no internasional.

Ikus liu, Diretor jeral kongratula INDMO no parseriu dezenvolvimentu sira ba eforsu koletivu ida ne’e, liu-liu organiza KNA Dahitu (eventu nasional ne’e hahu iha 2014).  Nia mos husu INDMO konta nafatin ho SEFOPE nia apoiu iha ambito prezerva integridade sistema formasaun profisional Timor-Leste nian.

Iha loron ne’e duni, Komisaun Organizadora no ekipa juri nebe hetan fiar anunsia mos rezultadu konkursu nian. Sentru Formasaun Profisional Irmaun Carlos Gamba,SDB (Fatumaca-Baucau) hetan Primeiru Lugar ho valor total 88.72 ho prémiu osan ho valor USD 2.500.00. CNEFP (Tibar-Liquiça) okupa iha Segundu Lugar ho valor total 86.52 no hetan prémiu osan ho valor USD 1.500.00. Claretian Training Center-CTC (Salele-Covalima) tur iha pozisaun datoluk ho valor total 85.09 no hetan prémiu osan ho valor USD 1000.00. Iha mos oportunidade komisaun organizadora no juri, anunsia mos mellor feto iha kompetisaun 2021 mak hanesan Esperança Lúcia Correia husi Sentru Irmaun Carlos Gamba, SDB; no Octaviana da Costa husi CTC Salele-Covalima. Kada formandu hetan prémiu  osan ho valor USD 250.00.

Porgrama enseramentu  KNA 2021 hetan partisipasaun husi reprezentante MCAE, SEFOPE, linhas ministerias sira seluk, ajensia dezenvolvimentu internasional sira, sentru fornesedor formasaun no konvidade sira seluk.

#Media INDMO#