INDMO-APACC KAPASITA KANDIDATU AKREDITOR NIVEL NASIONAL NO INTERNASIONAL
Dili, 23-08-2021, Entre loron 23 no 27 Agostu 2021, INDMO koopera ho Asia Pacific Accreditation and Certification Commission (APACC, sigla iha ingles) organiza APACC Accreditor’s Training ba timor-oan sira atu sai Acreditor APACC nian.
Programa formasaun nebe realiza liu husi online (Zoom) ho objetivu husi programa ne’e mak atu esplika kriteriu, indikador no sub-indikador sira APACC nian, transmiti papel, responsabilidade no atribuisaun sira ba Akreditor APACC nian, no informa prosesu nebe involve no dokumentu nebe presija molok, durante no depois avaliasaun institusional.
Kandidatu akreditor sira nain 20 mak INDMO selesiona bazeia APACC no Mata-dalan Akreditasaun APACC nain. Kandidatu sira ne’e mak ofisial sira entidade publiku no privadu sira, peritu edukasaun teknika no formasaun vokasional (TVET, sigla iha Ingles). Maske nune’e partisipante sira nebe tuir programa ne’e ho susesu mak sei hetan Sertifikadu Akreditor nian no sei hola parte ekipa Akreditor APACC.
Formasaun ne’e, ofisialemente loke ona husi Presidente APACC nian, Dr. Ramhari Lamichhane no Diretora INDMO, Senhora Isabel Fernandes de Lima. Partisipa mos iha abertura programa, Secretariu Exekutiva ANAAA, DR. Edmundo Viegas no Representante Diretor-jeral Formasaun Profisional no Empregu, Senhor Agustinho Cabral.
Programa ne’e, nudar implementasaun atividade ida husi MOU nebe asina ona entre APACC no INDMO iha 15 Novembru 2019 iha ambitu preparasaun insitutisaun TVET Timor-Leste nian, atu hetan mos akreditasaun APACC. INDMO no APACC nian mehi mak hasae kualidade instituisaun TVET sira atu produz forsa traballu nebe kompetente no ho kualidade a’as.
APACC nudar ajensia rejional akreditasaun no sertifikasaun estabelese liu husi Deklarasaun Seoul 2004, iha nebe Colombo Plan Staff College (CPSC) nudar organizasaun nebe lidera. APACC projeta atu fornese servisu akreditasaun no sertifikasaun internasional hodi hasoru sistema jestaun instituisaun TVET nebe kualidade.
#Média INDMO#
