MEMORANDO DE ENTENDIMENTO  (MdE) NEBE ASINA HUSI  INDMO, I.P NO MEJD NU’UDAR KOMPRIMISIU IDA

Instituto Nacional de Desenvolvimento de Mão-de-Obra, Instituto publiku (INDMO, I.P), estabelese liu husi Decreto-Lei n.º 8/2008, de 5 de março ne’ebé altera husi Decreto-Lei n.º 34/2009, de 26 de novembro, Decreto-Lei n.º 6/2017, de 22 de março, no Decreto-Lei n.º 54/2022, de 20 de julho, nudar orgaun reguladora ba sistema formasaun profisionál iha Timor-Leste. Instituto publiku ho nia natureza reguladora mak garante no promove no eleva kualidade formasaun  mão-de-obra iha rai laran atu bele responde ba merkadu traballu iha nivel nasionál no internasionál.

Planu Estratejiku Desenvolvimentu Nacional 2011-2030 (PEDN) estabelese katak hasa’e kapasidade  no kualidade Ensino Sekundariu Tekeniku Vokasional (ESTV)  mak nudar komponente importante no estratéjiku  ba desenvolvimento sócio ekonomiku Timor-leste nian. MJED mak nudar departamentu governamentál ne’ebé maka responsabiliza ba konsesaun, ezekusaun, koordenasaun no avaliasaun ba polítika ne’ebé define no aprova ona husi Conselho de Ministros, ba iha área ensinu no iha kualifikasaun nível ensinu hotu-hotu ne’ebé mak laós ensinu superior, inklui mos ensinu sekundáriu tekniku vokasionál, promosaun dalen ofisiál, juventude no desportu nudar hatur nanis ona iha artigu 22.º husi Decreto-Lei n.º 20/2020, de 28 de Maio, alterasaun dahuluk ba Decreto-Lei n.º 14/2018, de 17 de agosto, sobre a Orgânica do VIII Governo Constitucional.

Hatene mos katak tuir Sistema Nacional de Qualificações (SNQ-TL) ne’ebé aprova husi Decreto-Lei n.º 36/2011, de 17 de agosto konjuga ho atribuisaun INDMO, I.P, nian be hatur iha nia estatutu orgániku, INDMO, I.P, mak iha kompeténsia atu atribui lisensa, akredita sentru formasaun profisionál sira, inklui sertifika formador sira.

Ho nune’e, INDMO, I.P, no Ministério da Educação Juventude e Desporto (MEJD) marka tan  istoria foun ida mak hadi’a diak liu tan kualidade integral iha  Ensino Secundário Tékniku Vocacional (ESTV)  iha Timor-Leste liu husi asinatura Memorando de Entendimento  (MdE).

Ámbitu husi akordu entre INDMO, I.P no MEJD maka atu eleva kualidade ESTV sira nudar fatin be forma mão-de-obra ne’ebé preparadu ba iha ezijénsia merkadu laboral iha nível nasionál no internasionál, fó énfaze liu ba kontribuisaun iha área edukasaun nian mak hanesan: viabilizasaun ba dupla sertifikasaun, liu husi estabelese kritériu no indikador sira ba lisensiamentu no akreditasaun ESTV sira ho rigor; prosede revizaun kuríkulu ESTV iha área produtiva sira ho nune’e segunda parte bele validiza ba referénsia profisionál ka konteúdu formativu ba área produtiva haktuir ba enkuadramentu jurídiku kona-ba planu kurikular;  atribui sertifikasaun formador ba dosente sira ne’ebé responsabiliza iha matéria espesífika ba área produtiva, nudar kritériu atu hetan dupla sertifikasaun; no hadia diak liu-tan mekanizmu realizasaun Prova de Aptidão Profissional (PAP) no métodu avaliasaun para bele atribui dupla sertifikasaun. Parte rua iha komitmentu atu asegura oinsa bele implementa Decreto-Lei n.º 8/2010 de 15 de Fevereiro, que aprova o plano curricular, regime de implementação e modelo de certificação, organização e avaliação das escolas secundárias técnico-vocacionais.

Alende asinatura  ho MdE, INDMO, I.P entrega Sertifikadu 73 (hitunulu resin tolu) ba Fornesedor Formasaun Profisional no ekipa avaliador sira. Sertifikadu hirak ne’e  mak,  hanesan Sertifikadu Akreditasaun ba Tipu kursu no Nivel Formasaun hamutuk 26 (rua nulu resin nen), Sertifikadu Licenciamento Operasional 11 (sanulu resin ida), Sertifikadu Akreditasaun institusional 18 (sanulu resin ualu) no Sertifikadu  Apresiasaun ba  ekipa avaliador sira hamutuk 18 (sanulu resin ualu)

Nota de entendemento ne’e asina husi  Diretora INDMO, I.P Sra Isabel Fernandes de Lima no parte husi MEJD mak reprezenta husi Sr. Raimundo josé Neto,Diretor Geral Politica, Plano, Inclusão Impressão.

Seremonia  asinatura Memorando ne’e testamuña husi S.Excia Eng.Joaquim Amaral, Ministro Coordenador dos Assuntos Económicos (MCAE), ), S.Excia. Dr. Armindo Maia, Ministro da Educação Juventude e Desporto;  S.Excia Senhor Alarico de Rosário Secretario Estadu de Formação Profisional no Emprego (SEFOPE), S.Excia Senhor Faustino Cardoso Gomes Prezidente Komisaun Funsaun Públika (KFP), representantes setor privado sira, no dirijentes fornesedor formasaun profisional sira mai hu,si Dili  no munisipiu sira.

Eventu importante sira ne’e  realija iha Auditório da Academia da PNTL, Comoro Dili iha loron Kinta-Feira  26 Janeiru 2023.

Média INDMO I.P